Garðar hafnaði tveggja ára samningi við LASK Linz

Garðar Gunnlaugsson ætlar ekki að spila áfram með austurríska liðinu LASK Linz. Það kom fram í íþróttafréttum á Bylgjunni að Garðar sé búinn að hafna tveggja ára samningi við félagið.

Heimildarmaður íþróttadeildar Bylgjunnar veit ekki hvort að Garðar ætli að snú aftur til Íslands í sumar en hann er að skoða ýmsa möguleika í stöðunni.

Garðar kom til Linz í febrúar en gat þó ekki spilað sinn fyrsta leik fyrr en í apríl vegna nárameiðsla. Garðar lék alls fimm leiki með liðinu og var með eitt mark og tvær stoðsendingar í þeim.

Garðar lék áður með CSKA Sofia í Búlgaríu og IFK Norrköping í Svíþjóð en hann spilaði síðast hér heima með Valsmönnum sumarið 2006.