Þjóðfundarviljinn í Stjórnarskrá

Vel heppnaður Þjóðfundur 2010 skilaði frá sér skýrum skilaboðum. Öllum aðalatriðum er ég sammála og sáttur við skilaboðin og get með góðri samvisku sagt að efsta og veigamesta stefnumál mitt sem frambjóðanda númer 7814 sé að hrinda skilaboðum Þjóðfundar 2010 í framkvæmd.

Skilaboð Þjóðfundar

Meginlínurnar í skilaboðum Þjóðfundar 2010 voru:

Stjórnarskráin er sáttmáli sem tryggir fullveldi og sjálfstæði . Siðgæðisþema nýrrar stjórnarskrár skal vera mannvirðing, tjáningarfrelsi og tillitssemi. Allir skulu njóta mannréttinda svo sem tjáningarfrelsis, friðhelgi einkalífs, trúfrelsis og eignarréttar. Tryggja skal jafnræði fyrir lögum óháð kyni, trú, þjóðerni, kynþætti, búsetu og kynhneigð. Allir skulu njóta jafns réttar til náms, heilbrigðisþjónustu og félagsþjónustu.

Á Íslandi skal vera virkt og gagnsætt lýðræði þar sem valdhöfum er settur skýr rammi, þar sem mannvirðing, ábyrgð og skyldur við þegna landsins eru höfð að leiðarljósi. Lýðræðið byggi á þrískiptingu valds, þar sem skyldur og ábyrgð ráðamanna eru skýr. Ráðherrar skulu ekki gegna þingmennsku ásamt ráðherraembætti. Þingseta þingmanna háð tímatakmörkunum og þeim fækkað.

Ákvæði verði sett um kosningar með persónukjöri og um þjóðaratkvæðagreiðslur um mikilvæg málefni. Vægi atkvæða verði jafnt í einu kjördæmi

Endurskoða þarf vald forseta Íslands og taka afstöðu til neitunarvalds hans.

Skipan dómara skal endurskoðuð.

Ríki og kirkja verði aðskilin.

Náttúra og auðlindir landsins eru óframseljanleg þjóðareign sem ber að vernda, umgangast og nýta á sjálfbæran hátt þannig að aðgengi almennings sé tryggt. Náttúru Íslands og auðlindir ber að vernda fyrir komandi kynslóðir.

Ísland sé málsvari friðar og taki þátt í alþjóðasamstarfi í þeim tilgangi. Öryggi landsins skal tryggt. Ísland sé herlaust og kjarnorkuvopnalaust.

Mín áherslumál

Kjósendur geta borðið saman skilaboð Þjóðfundar 2010 við þau stefnuatriði sem ég setti fram 11. október. Þau eru:

- Virkara og beinna lýðræði.

- Þjóðaratkvæðagreiðslur. Að tiltekið hlutfall landsmanna geti krafist þjóðaratkvæðagreiðslu um tiltekin mál (vil að svo stöddu ekki binda mig við ákveðið hlutfall, en vil hafa það sem lægst). Að þjóðaratkvæðagreiðsla með ströngu þátttökuákvæði dugi til að afgreiða breytingar á stjórnarskrá, frekar en tvennar þingkosningar.

- Persónukjör.

- Landið eitt kjördæmi.

- Skýrari aðskilnaður framkvæmdavalds og löggjafarvalds. Ráðherrar gegni ekki löggjafarstörfum.

- Ákvæði um mikilvæg verkefni Umboðsmanns Alþingis verði komið fyrir í Stjórnarskránni til að tryggja aðhald embættisins í þágu þjóðarinnar.

- Ákvæði um ráðherraábyrgð og Landsdóm verði skýr og óyggjandi.

- Heimild til bráðarbirgðalaga gildi eingöngu í neyðartilvikum.

- Eignarhald auðlinda liggi hjá þjóðinni. Náttúruauðlindir, sem ekki eru háðar einkaeignarrétti (innskot - í þröngum og staðbundnum skilningi), verði lýstar þjóðareignir. Náttúruauðlindir og landsréttindi í þjóðareign megi ekki selja eða láta varanlega af hendi til einstaklinga né annara aðila. Þó megi veita heimild til afnota eða hagnýtingar á þessum auðlindum gegn gjaldi, sé hún tímabundin og háð endurskoðun.

- Ákvæði um náttúruvernd verði í Stjórnarskránni, ekki síst um að heilnæmt vatn og loft, náttúran og fjölbreytni hennar, landslag, annað umhverfi og aðgengi að náttúru séu gæði sem allir bera ábyrgð á að nýtt séu með sjálfbærum hætti. Tryggja ber öllum rétt til heilnæms vatns, lofts og annars umhverfis og aðgengis að náttúru.

- Aðskilnaður ríkis og kirkju.

- Ákvæði um herlaust Ísland og bann við stríðsyfirlýsingum.

- Staðfesting skipunar hæstaréttardómara lúti vilja aukins meirihluta Alþingis (2/3).