Umfjöllun: Erfiður vinnudagur Blika borgaði sig

Blikar eru komnir í efsta sætið í Pepsi-deild karla eftir 1-0 sigur á Fylki á Kópavogsvellinum í kvöld. Kristinn Steindórsson skoraði eina mark leiksins í upphafi síðari hálfleiks.

Það var flottur fótboltaleikur sem í boði var á Kópavogsvelli. Sá sem hér skrifar viðurkennir að hafa búist við öruggum sigri heimamanna þegar hann skoðaði leikskýrsluna fyrir leik en raunin varð önnur. Fylkismenn voru án sterkra leikmanna á borð við Kristján Valdimarsson, Tómas Joð Þorsteinsson, Val Fannar Gíslason og Ólaf Stígsson en þeirra skarð fylltu ungir menn sem stóðu sig vel. Á bekknum voru svo kornungir strákar.

Ekkert mark var skorað í fyrri hálfleiknum en fullt af flottum sóknum og góðum færum litu þó dagsins ljós. Fylkismenn fengu í raun betri færi fyrir hlé en eins og svo oft áður átti seinni hálfleikurinn svo eftir að reynast þeim illa.

Blikar skoruðu eina mark leiksins eftir vel útfærða skyndisókn á 49. mínútu sem byrjaði með löngu kasti frá Ingvari Kale. Haukur Baldvinsson átti svo frábæran sprett og sendi á Finn Orra sem tók skotið. Fjalar Þorgeirsson, markvörður Fylkis, náði að koma höndum í boltann sem stefndi markið þegar Kristinn Steindórsson mætti og kláraði dæmið.

Eftir þetta voru Blikar líklegri til að bæta við en gestirnir að jafna. Árbæingar gáfust þó alls ekki upp og sýndu mikla vinnusemi og dugnað. Skömmu fyrir leikslok hefðu þeir getað refsað heimamönnum og jafnað. Ingimundur Níels Óskarsson fór þá illa með dauðafæri.

Það voru Blikar sem fögnuðu í leikslok. Sigurinn ásamt tapi Eyjamanna á heimavelli þýðir að Blikar eru aftur komnir í toppsætið þar sem að þeir eru með stigi meira en ÍBV þegar þrjár umferðir eru eftir.

Fylkismenn eru áfram í bullandi fallhættu eftir fimmta deildartapið sitt í röð en það er huggun harmi gegn fyrir þá að önnur úrslit kvöldsins voru þeim í hag. Liðið er með fjórum stigum meira en Selfoss og Haukar þegar þrjár umferðir eru eftir.

Breiðablik - Fylkir 1-0

1-0 Kristinn Steindórsson (49.)

Áhorfendur: 1.653

Dómari: Gunnar Jarl Jónsson 8

Skot (á mark): 13-10 (8-5)

Varin skot: Kale 4 - Fjalar 7

Horn: 7-9

Aukaspyrnur fengnar: 9-9

Rangstöður: 0-2

Breiðablik 4-3-3

Ingvar Þór Kale 8

Jökull Elísabetarson 7

Kári Ársælsson 7

Elfar Freyr Helgason 6

Arnór Sveinn Aðalsteinsson 6

Finnur Orri Margeirsson 8* - Maður leiksins

Guðmundur Kristjánsson 6

Olgeir Sigurgeirsson 5

(62. Andri Rafn Yeoman 6)

Haukur Baldvinsson 7

(73. Guðmundur Pétursson -)

Kristinn Steindórsson 6

Alfreð Finnbogason 6

Fylkir 4-5-1

Fjalar Þorgeirsson 8

Ásgeir Örn Arnþórsson 5

Þórir Hannesson 7

Davíð Þór Ásbjörnsson 6

Kjartan Ágúst Breiðdal 5

Ásgeir Börkur Ásgeirsson 5

Andrés Már Jóhannesson 7

Andri Már Hermannsson 7

(73. Friðrik Ingi Þráinsson -)

Ingimundur Níels Óskarsson 5

Jóhann Þórhallsson 6

(88. Ragnar Bragi Sveinsson -)

Albert Brynjar Ingason 5