Kaka hjá Real Madrid: Tapið á móti Lyon var ekki mér að kenna

Kaka er farinn að fá harðari gagnrýni í spænskum fjölmiðlum fyrir frammistöðu sína með Real Madrid en Brasilíumaðurinn svaraði fyrir sig eftir að hafa verið gagnrýndur fyrir tapleikinn á móti Lyon í Meistaradeildinni í vikunni.

„Það er ekki mér að kenna að við töpuðum þessum leik. Allt liðið ber sök á hvernig fór," sagði Kaka við spænska blaðið AS.

„Við verðum allir að taka ábyrgð á þessum úrslitum og gera allt okkar til þess að snúa þessu við í seinni leiknum. Við höfum reynda leikmenn sem kunna að spila svona leiki," sagði Kaka.

Lyon vann leikinn 1-0 en seinni leikurinn fer fram á Bernabeu 10. mars. Það er mikið undir í Meistaradeildinni fyrir lið Real Madrid því félagið eyddi gríðarlegum fjármunum í leikmenn fyrir tímabilið enda ætla menn þar á bæ að gera allt til þess að komast í úrslitaleikinn sem er einmitt haldinn á sjálfum Bernabeu-leikvanginum í vor.