Deila um fánarönd fyrir dómstólum

Samband garðyrkjubænda og Matfugl ehf. deila nú um vörumerki fyrir héraðsdómi.

„Sambandið er með vörumerki sem á er fánarönd. Matfugl merkir sína vöru, það er kjúklingana, með fánarönd sem er nánast eins og okkar,“ útskýrir Þórhallur Bjarnason formaður Sambands garðyrkjubænda. „Þeir hafa ekki viljað hætta notkun randarinnar þannig að við þurftum að fara dómstólaleiðina úr því að þeir vildu ekki viðurkenna okkar rétt, þótt þetta sé skráð vörumerki hjá okkur.“

Þórhallur segir sambandið búið að kosta miklu til fyrir vörumerkið, bæði hvað varðar hönnun, skráningu og auglýsingar. Merkið sé einungis fyrir félaga Sambands garðyrkjubænda.

„Þetta eru ákveðin verðmæti sem við erum að verja. Okkur er nauðugur kostur að sækja þetta mál fyrir dómstólum,“ segir Þórhallur. Sveinn Jónsson, framkvæmdastjóri Marfugls, sem segir röndina sem um er deilt gjörólíka á vörumerkjunum. „Hún er í allt öðrum hlutföllum og ekki einu sinni sambærileg í útliti,“ segir hann.

„Það eina sem er sameiginlegt með merkjunum er að röndin er fengin úr íslensku fánalitunum. Við erum að leggja áherslu á íslenska framleiðslu með þessu.“ - jss