Wenger: Jafntefli var sanngjörn niðurstaða

„Byrjunin á leiknum var okkur afar erfið. Barcelona hefði hæglega getað skorað nokkur mörk á fyrstu 20 minútum leiksins," sagði Arsene Wenger, stjóri Arsenal, eftir leikinn við Barcelona í kvöld.

„Við vorum að tapa boltanum of snemma. Ef ég á að vera sanngjarn við leikmennina þá sýndu þeir karakter og neituðu að gefast upp.

Barca klúðraði færum og við klúðruðum líka ótrúlegum færum. Mér fannst 2-2 jafntefli vera sanngjarnt eftir allt saman," sagði Wenger.

„Það sem ég er sárastur yfir í kvöld, og ég neita því ekki að við spiluðum gegn frábæru liði, er að við gáfum tvö ódýr mörk. Mér fannst alveg ótrúlegt hvernig við töpuðum boltanum í kvöld."