Hinn sérstaki fullkomnaði þrennuna - Inter Evrópumeistari

Jose Mourinho landaði þrennunni í kvöld er lið hans Inter tryggði sér Evrópumeistaratitilinn með 2-0 sigri gegn FC Bayern. Diego Milito skoraði bæði mörk Inter-liðsins í kvöld. FC Bayern vildi fá vítaspyrnu snemma leiks eftir að boltinn snerti hönd Maicon, leikmanns Inter, innan vítateigs. Ekkert var dæmt og þjóðverjarnir ósáttir við, Howard Webb, dómara leiksins. Fyrsta mark leiksins skoraði argentíski landsliðsmaðurinn Diego Milito eftir góða sendingu frá Wesley Sneijder en þeir félagar áttu stórleik í liði Inter í kvöld. Staðan 1-0 og þannig stóðu leikar í hálfleik. Síðari hálfleikur byrjaði heldur fjörlega en bæði lið áttu góð tilþrif og sköpuðu sér góð færi strax á fyrstu tveimur mínútunum. Diego Milito var svo aftur á ferðinni á 70. mínútu en þá fékk hann boltann frá Samuel Eto'o, fór ílla með Van Buyten og kláraði færið glæsilega í fjærhornið. Lokatölur 2-0 fyrir Inter og gífurleg fagnaðarlæti brutust út í Madrídarborg.