Umfjöllun: Gylfi skaut Íslandi á EM

Gylfi Þór Sigurðsson skoraði tvö glæsileg mörk gegn Skotum á Easter Road í kvöld og skaut íslenska U-21 árs liðinu í úrslitakeppni EM næsta sumar.

Það þarf varla að hafa mörg orð um hversu merkilegur árangur það er. Aðeins átta bestu þjóðir Evrópu í þessum aldursflokki komast í lokamótið og Ísland er í þeim hópi. Það, eitt og sér, er eitt merkasta íþróttaafrek sem unnið hefur verið af Íslendingum.

En lengi vel var útlitið nokkuð dökkt í kvöld. Skotum dugði 1-0 sigur til að komast áfram og þeir mættu gríðarlega öflugir til leiks. Það var allt annað að sjá til liðsins en á Laugardalsvellinum á fimmtudaginn þar sem hægt var að undrast á að liðið hefði unnið sinn riðil og komist þetta langt í keppninni.

En í kvöld sýndu Skotar að þeir eru með hörkulið. Þeir komu íslenska liðinu í opna skjöldu í fyrri hálfleik og voru strákarnir einfaldlega stálheppnir að sleppa inn í leikhléið án þess að hafa fengið á sig mark.

Hættulegasta sóknaraðgerð Skotanna kom á fimmtándu mínútu. Þeir komust í skyndisókn eftir að Ísland tók hornspyrnu. Jamie Murphy, sem skoraði mark Skota á Laugardalsvellinum, náði að komast inn fyrir aftasta varnarmann íslenska liðsins, Hjört Loga Valgarðsson, og skjóta í stöngina.

Annar leikmaður Skota náði frákastinu og skaut að marki en í þetta sinn varði Andrés Már Jóhannesson á marklínu. Þriðja marktilraunin kom strax á eftir - bakfallsspyrna en boltinn fór framhjá.

Skotarnir voru mjög grimmir í sínum sóknaraðgerðum en sem betur fer voru þeir of ragir við að klára færin með almennilegum Skotum. Þrátt fyrir allt átti Ísland fleiri marktilraunir en Skotar í fyrri hálfleiknum. Gylfi Þór Sigurðsson átti laglegan sprett upp miðjan völlinn snemma leiks sem lauk með ágætu skoti og Aron Einar Gunnarsson átti tvær ágætar skottilraunir af löngu færi.

Eyjólfur Sverrisson sýndi í seinni hálfleik að hann er klókur þjálfari. Íslenska liðinu tókst að stöðva uppspil Skotanna að stóru leyti og vann sig inn í leikinn hægt og rólega. Strákarnir fóru að spila betur, voru rólegri í sínum aðgerðum og yfirvegaðir.

En færin voru þó fá. Það var ekki fyrr en að rúmur stundarfjórðungur var til leiksloka að Gylfi Þór tók til sinna mála og braut ísinn. Hann fékk boltann á hættulegum stað og var fljótur að færa sér það í nyt og skoraði afar laglegt mark með glæsilegu skoti.

Skotar tóku miðju og áttuðu sig á því að Arnar Darri Pétursson stóð heldur langt frá sínu marki. Chris Maguire lét vaða aog náði að setja boltann yfir Arnar Darra og í markið.

En aðeins fimm mínútum síðar tók Gylfi aftur til sinna mála og í aftur „klíndi“ hann boltanum efst í markhornið með bylmingsskoti. Hann hafði haft fremur rólegt um sig lengst af í leiknum en hann sýndi með þessum tveimur mörkum af hverju hann er orðinn einn dýrasti knattspyrnumaður Íslands frá upphafi.

En þegar uppi er staðið skiptir það litlu sem engu máli hvort strákarnir spiluðu vel eða ekki í kvöld. Þeir gerðu nóg til að klára sitt og tryggja farseðilinn til Danmerkur. Þar með var unnið mikið afrek sem mun sjálfsagt vekja athygli víða í knattspyrnuheiminum.



Skotland – Ísland 1-2

0-1 Gylfi Þór Sigurðsson (74.)

1-1 Chris Maguire (75.)

1-2 Gylfi Þór Sigurðsson (80.)

Easter Road. Áhorfendur: 12.320

Dómari: Markus Strömbergsson, Svíþjóð (8)

Skot (á mark): 13–14 (6-7)

Varin skot: Martin 5 – Arnar Darri 3

Hornspyrnur: 5–5

Aukaspyrnur fengnar: 11–14

Rangstöður: 0–1

Smelltu hér til að opna Boltavaktina og lesa lýsingu leiksins: Skotland U-21 - Ísland U-21.