Frjálslyndir eiga ekki fyrir skuldum

Frjálslyndi flokkurinn hyggst taka þátt í bæjar- og sveitarstjórnarkosningum í vor. Formaður flokksins segir að fjárhagstaðan sé slæm og að flokkurinn eigi ekki fyrir skuldum.

Miðstjórn Frjálslynda flokksins fundaði um þátttöku flokksins í bæjar- og sveitarstjórnarkosningum í gær. Skipuð verður þriggja manna nefnd til að fara yfir málið og koma með tillögur um næstu skref.

„Það er þegar búið að ákveða að við verðum í Í-listanum vestur á Ísafirði þar sem við verðumí sameiginlegu framboði með Vinstri grænum og Samfylkingu. Síðan eru menn að ráðgera að bjóða fram í Kópavogi svo kom fram á fundinum í gær áhugi manna í Skagafirði og Grindavík," segir Guðjón Arnar Kristjánsson, formaður Frjálslynda flokksins.

Ekki liggur fyrir hvort flokkurinn bjóði fram í Reykjavík. Fjárhagsstaða flokksins er slæm. „Hún er þannig að við eigum ekki fyrir skuldum eins og er. Við erum að reyna að vinna úr því," segir Guðjón Arnar.