Kannabisrest í dós á klóinu

Leifar af kannabisefnum fundust í dós inni á salerni Tækniskólans síðastliðinn fimmtudag, þegar lögregla leitaði í húsnæðinu með þrem fíkniefnaleitarhundum, að beiðni skólayfirvalda.

Þetta staðfestir Geir Jón Þórisson, yfirlögregluþjónn hjá lögreglunni á höfuðborgarsvæðinu.

Hann segir jafnframt að staðfestur orðrómur hafi verið um að nemendur úr grunnskólanum við hlið Tækniskólans hafi leitað inn í Tækniskólann til að komast í fíkniefni hjá einhverjum af eldri nemendum þar. Sterk vísbending sem komið hafi til kasta forvarnafulltrúa lögreglunnar hefði gefið tilefni til að þessi mál voru tekin föstum tökum í grunnskólanum. Jafnframt að það hafi þótt ástæða til að athuga Tækniskólann í ljósi þessara upplýsinga.

Fíkniefnaleitin í Tækniskólanum vakti mikla athygli. Baldur Gíslason, skólameistari, sagði við það tilefni við Fréttablaðið að verið væri að fylgja fordæmi annarra skóla í forvarnaskyni en fjöldi skóla hefði látið gera fíkniefnaleit innan sinna vébanda. Enginn sérstakur grunur hafi verið til staðar um fíkniefnaneyslu í Tækniskólanum. Ekkert hefði fundist og niðurstaðan væri ánægjuleg.

„Í niðurstöðu samantektar hjá okkur um tíðni fíkniefnaleita í framhaldsskólum eru það einn til tveir skólar á ári, frá árinu 2007, sem biðja lögreglu um slíka leit," segir Geir Jón. „Það er einungis farið í þá skóla þar sem skólastjórnendur óska eftir því. Í einu tilviki var gerð leit að frumkvæði nemenda."

Spurður um hvort beiðnir af þessu tagi séu grundvallaðar á rökstuddum grun um fíkniefnaneyslu í viðkomandi skóla segir Geir Jón þær oftar en ekki tilkomnar vegna orðróms eða gruns um slíkt.

„Ef upplýsingar eru þess eðlis að skólayfirvöldum sýnist að tímabært sé að taka á þessu með þessum hætti, sem hefur mikið forvarnagildi, þá er það gert og þess gætt að hafa allt saman eftir settum reglum. Þess er gætt að persónulega sé ekki gengið að neinum nema í samráði við viðkomandi."

Geir Jón segir að í sumum þeirra skóla sem leitað hafi verið í hafi fundist vísbendingar um neyslu.

„Það hafa fundist leifar af efnum, verkfæri til fíkniefnaneyslu eða að hundar hafa vakið athygli á nemendum sem sjálfir hafa verið í neyslu eða í snertingu við neyslu. En í flestöllum tilvikum sýnist mér að ekkert slíkt hafi komið fram."

jss@frettabladid.is