Fáfnismenn vilja alls fjórar milljónir frá íslenska ríkinu

Sjö einstaklingar, sem tilheyrðu vélhjólaklúbbnum Fáfni, en hann heitir núna MC Iceland og eru svokallaðir Hells Angels Prospeckt, vilja alls 4,2 milljónir fyrir meintar ólögmætar handtökur. Málin voru tekin fyrir í Héraðsdómi Reykjavíkur í dag en aðalmeðferð hefur verið ákveðin 26. september. Vegna anna hjá héraðsdómi var ekki hægt að rétta í málunum fyrr.

Atvikið átti sér stað í lok júlí árið 2007. Þá ruddist sérsveit ríkislögreglustjóra inn í húsnæði vélhjólaklúbbsins í miðborg Reykjavíkur. Tíu menn voru handteknir og þar af voru tveir þeirra hnepptir í gæsluvarðhald en úrskurðar í öðru málinu er að vænta bráðlega.

Hver og einn Fáfnismaður krefst 600 þúsund króna af íslenska ríkinu en meðal þeirra er síbrotamaðurinn Jón Trausti Lúthersson sem hefur margsinnis komist í kast við lögin, meðal annars vegna ofbeldis.

Einn meðlimur Fáfnis hefur þegar sigrað dómsmál vegna ólögmætrar handtöku og fékk þá 150 þúsund krónur í bætur. Því þykir líklegt að félagar hans sigri einnig í héraðsdómi.

Vélhjólaklúbburinn Fáfnir hefur komist allnokkrum sinnum í fréttirnar eftir að þeir sóttu um inngöngu inn í Hells Angels. Dómsmálaráðherrann, Ragnar Árnadóttir, hefur meðal annars látið hafa eftir sér að hún vilji banna klúbbinn hér á landi.