Matthías: Stigin þrjú það sem máli skiptir

„Við erum fyrst og fremst ánægðir með þessi þrjú stig, en það er það eina sem skiptir máli," sagði Matthías Vilhjálmsson ,leikmaður FH-inga, eftir sigurinn gegn Selfyssingum í kvöld.

FH-ingar báru sigur úr býtum gegn Selfyssingum 2-1 í 19.umferð Pepsi-deildar karla í kvöld.



„Við skoruðum fleiri mörk en þeir og það skilaði okkur þessum sigri. Við fengum heilann helling af færum sem við nýttum okkur ekki og þess vegna komust Selfyssingar inn í leikinn."

„Við erum í ágætis málum í deildinni en Eyjamenn og Blikar eru ennþá fyrir ofan okkur. Við verðum bara að halda áfram okkar striki og taka fyrir einn leik í einu, sjá svo til hvar við endum í lokin," sagði Matthías.

FH-ingar mæta Stjörnunni í næstu umferð á gervigrasinu í Garðabæ, en þeir töpuðu illa fyrir þeim fyrr í sumar.

„Það leggst bara vel í okkur að fara í Garðabæinn, en við eigum harm að hefna frá tapinu fyrr í sumar. Við áttum frábæran leik á gervigrasinu í fyrra og stefnum á það að endurtaka þann leik," sagði Matthías Vilhjálmsson ánægður í leikslok.