Nauðgaði og átti barnaklám

Ríkissaksóknari hefur ákært fésbókarmanninn svokallaða fyrir ýmis brot, þar á meðal gróf kynferðisbrot gegn tveimur stúlkum, sem hann komst í kynni við á Facebook.

Maðurinn er ákærður fyrir nauðgun, þar sem ofbeldi og ólögmætri nauðung var beitt, gagnvart annarri stúlkunni. Hann sætir jafnframt ákæru fyrir frelsisviptingu í þessu tilviki. Þá er maðurinn ákærður fyrir að nauðga hinni stúlkunni með því að notfæra sér yfirburði sína gagnvart henni og neyta aflsmunar.

Í ákæru segir einnig að maðurinn sé ákærður fyrir brot gegn því ákvæði hegningarlaga sem bannar kynmök við börn undir fimmtán ára aldri. Þá hefur hann verið ákærður fyrir vörslu barnakláms. Að auki hefur maðurinn verið ákærður fyrir auðgunarbrot, sjö þjófnaði, tvær gripdeildir og umferðar- og fíkniefnalagabrot.

Enn eru til rannsóknar tvö kynferðisbrot mannsins gegn börnum undir fimmtán ára aldri. Ákvörðun um hvort maðurinn verði einnig ákærður fyrir þau verður væntanlega tekin fljótlega, en þau mál eru á leið til ríkissaksóknara.

Málið verður þingfest fyrir dómi á mánudag næsta og verður þinghald lokað.- jss