Fjölmiðlafárið var of mikið fyrir mig

Sænska prinsessan Madeleine talaði í fyrsta sinn opinberlega um sambandsslitin við Jonas Bergström síðasta vor í blaðaviðtali í vikunni. Þau voru nýtrúlofuð þegar upp komst um ítrekað framhjáhald kappans, meðal annars með ungri norskri stúlku sem seldi sögu sína til slúðurblaða þar í landi.

Madeleine ákvað að opna sig í helgar­útgáfu sænska dagblaðsins Dagens Nyheter en þar kemur fram að hún hafi átt mjög erfitt með þetta allt saman. „Sama dag og sænska krúnan staðfesti sambandsslitin ákvað ég að fljúga til New York. Athyglin og fjölmiðlafárið var of mikið fyrir mig á þessum tíma,“ viðurkennir hún með einlægum hætti en hún tók sér langt frí frá opinberum störfum til að komast aftur í andlegt jafnvægi.

Madeleine hefur ákveðið að flytja til New York í eitt ár en þar segist hún geta gengið um göturnar án þess að fólk beri kennsl á hana. „Stokkhólmur getur verið ótrúlega lítil borg stundum og ég er á þannig krossgötum í mínu lífi að ég þarf tilbreytingu.“

Skipst hafa á skin og skúrir í sænsku konungsfjölskyldunni en fyrst sleit Madeleine trúlofun sinni, svo gekk krónprinsessan Viktoría í það heilaga og nú síðast í haust kom út mikil skandalabók um kónginn sjálfan Karl Gústaf.