Vel heppnað transkvöld: Tólf mættu

Tólf manns mættu á trans-ungmennakvöld sem haldið var um helgina. Viðburðurinn var ætlaður ungu transfólki, þeim sem telja sig hafa fæðst í líkama af röngu kyni, og var haldinn í regnbogasal Samtakanna 78.

Ugla Stefanía Jónsdóttir segir að henni hafi komið skemmtilega á óvart hversu margir mættu. „Þetta var alveg frábært," segir hún. Ugla fæddist sjálf í líkama karls en hefur hafið ferli til leiðréttingar á kyni hennar.

„Við bjuggumst alls ekki við svona mörgum. Sumir sem mættu voru meira að segja ekki komnir út," segir Ugla og á þar við að þeir hafi ekki opinberað að þeir teldu sig fædda í líkama af röngu kyni.

Miklu fleiri en í fyrra



Ugla kom að skipulagningu ungmennakvöldsins en markmiðið með kvöldinu var að fræða og veita stuðning. Henni finnst því mjög ánægjulegt að þarna hafi mætt fólk sem ekki hefur þorað að stíga fram áður. „Þarna var fólk sem vissi ekki hvernig aðgerðin gengur fyrir sig og vantaði upplýsingar," segir hún.

Á síðasta ári var einnig haldið fræðslukvöld fyrir ungt transfólk en þá mættu aðeins örfáar hræður. Ugla telur ástæðu þess að fleiri mættu nú vera þá að umræðan um málefni transfólks sé orðin opnari.

Fær bráðum kvenhormón



Ugla er aðeins nítján ára og byrjar á næstu vikum hormónameðferð þar sem henni eru gefin kvenhormón. Nokkur tími kemur til með að líða þar til hún fer í aðgerðir til að kynleiðréttingar. „Undirbúningurinn fyrir hormónameðferðina er að lifa eftir kynhlutverkinu sem maður ætlar að láta leiðrétta sig í. Það felst í því að ég fór að ganga undir kvenkyns nafni og segja fólki frá því hvert framhaldið yrði ," segir Ugla.

Auk þess þarf fólk að gangast undir sálfræðipróf áður en það byrjae í hormónameðferð og hefur Ugla lokið því.

Algjör trúnaður ríkir um hverjir mættu á fundinn og voru myndatökur með öllu bannaðar.

Fundurinn var opinn ungu transfólki upp að þrítugu, og öllum þeim sem telja sig á einhvern hátt telja sig vera transgender, en það orð hefur hér á landi verið notað sem regnhlífarhugtak yfir þá sem fæðst hafa í líkama af röngu kyni.

Ókunnugt fólk stolt af þeim

Ugla Stefanía var í opinskáu viðtali í Íslandi í dag á Stöð 2 fyrir nokkru þar sem hún sagði sögu sína, ásamt Hans Miniar Jónssyni, 27 ára karlmanni sem fæddist í líkama konu.

Ugla segir að þau hafi fengið afar góð viðbrögð við viðtalin „Ókunnugt fólk hefur komið upp að okkur úti í búð eftir þetta og sagst vera stolt af okkur," segir hún.

Á næstunni er fyrirhugað að halda málþing um álefni transfólks á Íslandi, en orðið transgender hefur verið notað hér á landi sem eins konar regnhlífahugtak yfir þá sem fæðst hafa í líkama af röngu kyni.

Ungmennakvöldið var skipulagt í samstarfið við félögin Trans-Ísland, Q-félag hinsegin stúdenta, Samtökin 78, Ungliðahreyfingu samtakanna 78 og Samtökin 78 á Norðurlandi.