Tímabilið hjá Essien líklega búið

Líklegt er að Michael Essien spili ekki meira með Chelsea það sem eftir lifir tímabilsins en útilokað er að hann verði með liðinu þegar það mætir Stoke í ensku úrvalsdeildinni á sunnudag.

Essien hefur verið frá síðan hann meiddist í leik gegn Apoel Nicosia í Meistaradeild Evrópu í desember. Hann meiddist svo á hné þegar hann var með landsliði sínu, Gana, í Afríkukeppninni í janúar.

Chelsea er á toppi ensku úrvalsdeildarinnar en á eftir að spila við Stoke, Liverpool og Wigan í síðustu umferðum deildarinnar auk þess sem það mætir Portsmouth í úrslitum ensku bikarkeppninnar.

Þó er búist við því að Essien verði búinn að jafna sig fyrir HM í Suður-Afríku í sumar.