Sjötug kona handtekin vegna ofbeldisfullrar hegðunar

Kona á sjötugsaldri var handtekin um helgina en hún sló til gesta og starfsfólks á öldurhúsi í Reykjavík. Lögreglan var því kölluð á vettvang og þurfti að handtaka konuna sem lét öllum illum látum.

Þá sló tapsár íþróttamaður til áhorfanda þegar hann gekk af vellinum eftir að hafa tapað kappleik. Lögreglan hefur ekki gefið upp hvaða kappleik um ræðir. En áhorfandinn tilkynnti atvikið til lögreglunnar á höfuðborgarsvæðinu sem segir honum hafa verið stórlega misboðið.

Þá var karlmaður á þrítugsaldri handtekinn aðfaranótt laugardags eftir að hafa slegið tvær tennur úr tvítugum pilti í miðborg Reykjavíkur. Árásarmaðurinn var færður í fangageymslur lögreglunnar þar sem hann fékk að dúsa yfir nóttina.

Alls voru fimm líkamsárásir tilkynntar til lögreglunnar um helgina.