Berst gegn fitufordómum

Fordómar gegn feitu fólki eru orðnir svo rótgrónir að fæst okkar átta sig lengur á þeim. Þetta segir bandarískur rithöfundur og baráttukona sem er stödd hér á landi.

Hvað eru fitufordómar? Hvernig birtast þeir? Hvernig getum við upprætt þá?

Þessum spurningum er varpað fram á málþingi við Háskóla Íslands á morgun.

Meðal fyrirlesara á þinginu er Marilyn Wann, bandarískur rithöfundur og baráttukona fyrir réttindum feitra.

Marilyn segist ekki alltaf hafa verið sátt við holdafar sitt. Hún hafi þurft að þola stríðni sem barn.

Þegar hún hafi orðið fullorðin hafi tryggingafélög hafi ekki viljað líftryggja hana þar sem hún hafi verið þung, algjörlega hafi verið litið framhjá því að henni hafi nær aldrei orðið misdægurt um ævina.

Þetta þykir henni óeðlilegt ástand og hvetur hún fólk til að berjast gegn því sem og hvers kyns mismunun.

„Ég hef heyrt fólk segja 5 þúsund sinnum eða oftar að offita sé mjög slæm. En ég er mjög feit manneskja og ég lifi mjög góðu lífi. Ég tel líka að við getum öll verið heilbrigð, borðað góðan mat, stundað æfingar og ef maður er samt feitur hvað er þá til bragðs að taka? Við þurfum þá að spyrja hvort þetta sé þyngd eða heilsa," segir hún.

Marilyn nefnir sem dæmi að oft er ráðist í einhvers konar heilsuátak og þá á að segja offitu stríð á hendur.

Hún segist ekki skilja hvernig fólki dettur slíkt í hug enda verður offita ekki aðskilin feitu fólki. Ekki viti hún hvað það hafi gert að sér til að verðskulda slíkt. Frekar eigi að berjast gegn lélegum og heilsuspillandi lifnaðarháttum.

Það sé ekki sjálfgefið að feitt fólk hafi gerst sekt um slíkt eins og margir geri ráð fyrir.

„Ég tel að stríðið gegn offitu sé stríð gegn feitu fólki og ég kýs frekar frið. Mér líkar ekki við stríð. Mér finnst að við ættum að gera eitthvað sem kallar ekki á það að við séum vond við hóp fólks," segir Marilyn að lokum.