Kona frá Chile getur ekki sofið vegna áhyggjanna

Kona frá Chile sem búsett er hér á landi hefur ekkert heyrt í fjölskyldu sinni sem lenti í jarðskjálftanum þar í landi á laugardag. Hún segist ekkert hafa sofið síðustu sólarhringa og lítið getað gert annað en beðið og vonað það besta.

Fabiola Castillo hefur búið hér á landi ásamt íslenskum eiginmanni sínum, í níu ár og starfar á leikskóla í Garðabæ. Hún er frá litlu þorpi rétt fyrir utan borgina Conception sem er um 90 kílómetra frá upptökum skjálftans, sem skall á um hálf fjögur leytið á laugardagsmorgun.

Hún segist ekkert hafa heyrt frá fjölskyldu sinni síðan þá, þó óljósar fréttir um afdrif þeirra hafi borist í gegnum Facebook.

Skjálftinn á laugardag var um 8,8 á Richter en talið er að yfir 700 manns hafi látist. Fabiola hefur fylgst vel með ástandinu og segir það skelfilegt og rafmagnsleysi og vatnsskortur ríki á svæðinu.

Fabiola segir óvissuna versta og erfitt sé að lýsa með orðum hvernig það sé að vita ekkert um foreldra sína og nánustu ættingja.

Fabiola segir íbúa Chile meðvitaða um að svona geti gerst og vonar að flestir hafi náð að fylgja viðbragðsáæltun sem hafi legið fyrir. Hún segist lítið annað geta gert en að bíða, fyrir framan tölvuna og vona það besta.

Talið er að fjörutíu íslendingar séu í höfuðborginni Santiago og í Conception. Nú rétt fyrir fréttir var búið að ná sambandi við þrjátíu og níu þeirra sem allir eru heilir á húfi.

Flugvellir í borgunum eru lokaðir sem stendur og ekki er búist við að almenningur geti byrjað að fljúga frá landinu fyrr en í fyrsta lagi á miðvikudag eða fimmtudag.