Sighvatur: Áfall fyrir stofnunina

Sighvatur Björgvinsson framkvæmdastjóri Þróunarsamvinnustofnunar Íslands segir að fjármálamisferli Jóhanns Pálssonar, fyrrverandi umdæmisstjóra Þróunarsamvinnustofnunar Íslands í Mósambík sé áfall fyrir stofnunina og starfsfólk hennar.

Sighvatur segir ekki liggja fyrir um hve háar fjárhæðir sé að ræða. „Það er til rannsóknar. Við tókum þá ákvörðun að kalla allt okkar bókhald heim á heim tíma sem þessi maður var að störfum sem æðsti yfirmaður okkar verkefna í Mósambík en hann var þar árin 2006 til 2009. Málið er nú komið til efnahagsbrotadeildar og þar fer rannsóknin fram með aðstoð Ríkisendurskoðunar. Nú er verið að kanna hve miklar upphæðir og hve mörg tilvik er um að ræða," segir Sighvatur.

Að sögn hans kom málið upp við umdæmisstjóraskiptin sem voru í janúar á þessu ári. „Hann var búinn að ljúka sínum ráðningasamningi. Þá fer fram skoðun á bókhaldsgögnum og við skiptin, áður en nýr maður tók við komu í ljós nokkur dæmi sem okkur fannst þurfa skýringar við. Við tókum þá ákvörðun um að fara nákvæmlega eftir reglum og láta skoða allt bókhaldið frá því hann tók við."

„Þetta kom okkur afskaplega mikið á óvart," segir Sighvatur. „Þessi maður er búinn að vinna lengi hjá okkur og hefur verið mjög duglegur og afkastamikill og hefur notið fulls trausts. Þetta er áfall fyrir stofnunina og starfsmennina sem vinna hjá henni."

Að sögn Sighvats mun Jóhann þegar hafa viðurkennt nokkur dæmi um misferli. „En það er ekki tæmandi," segir Sighvatur Björgvinsson að lokum.