Bifhjólaslysum fækkar

Slysum þar sem bifhjól koma við sögu fækkar umtalsvert árið 2009 borið saman við árið 2008. Þetta kemur m.a. fram í slysaskýrslu Umferðarstofu fyrir árið 2009. Heildarfjöldi slasaðra og látinna fer úr 107 niður í 89 en þetta er 16,8% fækkun.

Í þessum tölum er samanlagður fjöldi lítið slasaðra, alvarlega slasaðra og látinna sem voru á léttum og þungum bifhjólum. Árið áður hafði hinsvegar samanlagður fjöldi slasaðra og látinna bifhjólamanna fjölgað um 18,9%. Það hefur því náðst umtalsverður árangur í fækkun bifhjólaslysa.

Það má ætla að fækkun slysa á bifhjólamönnum er fyrst og fremst því að þakka að betri ökumenn eru nú á götum og vegum landsins en áður. Að baki því liggur m.a. öflugt eftirlit og aðhald lögreglu og ekki hvað síst fræðsla og áróður sem lögð hefur verið sérstök áhersla á undanfarin ár.

Einnig hefur verið sköpuð aðstaða til æfinga akstursíþrótta á bifhjólum eins og æfingaaðstaða Road Race deildar akstursíþróttafélags Hafnarfjarðar er dæmi um. Ætla má að með því hafi hraðaksturs í einhverjum tilfellum verið færður inn á örugg æfingasvæði fjarri almennri umferð. Auk þessa má nefna að í dag eru bílstjórar almennt betur meðvitaðir um að bifhjólamenn eru ríkir þátttakendur í umferðinni.