Jóhanna útilokar ekki að skipuð verði ný samninganefnd

Forsætisráðherra segist þurfa að sjá mikla samstöðu hjá þingi og þjóð ef setja eigi nýja samninganefnd til að semja aftur við Breta og Hollendinga um Icesave. Hún útilokar ekkert í þeim efnum en segir þó mikilvægt að réttur almennings til að kjósa um málið verði virtur.

Þjóðaratkvæðagreiðsla vegna Icesave málsins er í fullum undirbúningi en æ háværari kröfur eru um að Íslendingar eigi setjist aftur að samningaborðinu við Breta og Hollendinga.

Ingibjörg Sólrún Gísladóttir fyrrverandi utanríkisráðherra ritaði grein í Fréttablaðið í dag undir yfirskriftinni Mál að linni. Þar segir hún að skipa ætti þverpólitíska sátta- og samninganefnd sem hefði það hlutverk að semja fyrir Íslands hönd við Breta og Hollendinga. Hún telur að það ætti að gerast strax því brýnt væri að leysa málið.

Jón Daníelsson hagfræðingur hjá LSE hefur einnig tekið í sama streng. Þá sagði Eva Joly ráðgjafi sérstaks saksóknara í viðtali við Ríkisútvarpið að semja ætti um Icesave að nýju.

Framsóknarflokkur og Sjálfstæðisflokkur hafa báðir sagt að þeir muni styðja lagasetningu um þjóðaratkvæðagreiðslu á Alþingi á morgun. Hins vegar rétti ríkisstjórnin fram sáttarhönd og hyggst skipa samninganefnd að nýju munu þeir taka þátt í því.

„Við höfum þessa skyldu við þjóðina að hún fái þessa þjóðaratkvæðagreiðslu sem hefur verið kallað eftir og við erum að undirbúa það," segir Jóhanna Sigurðardóttir, forsætisráðherra.

Sé breiður vilji hjá þjóðinni um að fara aðra leið segist Jóhanna reiðbúin til að skoða það því þá sé komin upp ný staða. „En það þurfa auðvitað miklar breytingar að koma til ef taka á þjóðaratkvæðagreiðsluna frá þjóðinni," segir Jóhanna.