Þingmenn VG koma skilaboðum til ráðherra með fréttatilkynningum

Eygló Harðardóttir, þingmaður Framsóknarflokksins segir undarlegt að stjórnarliðar sendi frá sér fréttatilkynningar þegar þeir vilja koma einhverju á framfæri við sína eigin ríkisstjórn. Þar vísar hún til tilkynningar sem þingflokkur VG sendi frá sér í gærkvöldi varðandi söluferlið á HS orku. Þar ítrekar þingflokkurinn þá grundvallarstefnu sína að allar auðlindir þjóðarinnar eigi að vera sameign hennar.

Þingflokkurinn beinir því til ríkisstjórnarinnar að skoða alla möguleika til að vinda ofan af einkavæðingu HS Orku og tryggja orkuauðlindirnar og orkufyrirtækin varanlega í almannaeign. Þá telur þingflokkurinn fulla þörf á að rannsaka allt ferlið í kringum söluna á HS orku.

„Þið eruð í ríkisstjórn"

Eygló undrast þessi vinnubrögð í pistli sem heitir „Þið eruð í ríkisstjórn," á bloggsíðu sinni. Einkum og sér í lagi þar sem ríkisstjórnin situr í skjóli meirihluta Alþingis og þar með þingflokks Vinstri grænna.

„Það er ekki eins og það sé mjög erfitt að nálgast og spjalla við þessa ráðherra. Þeir sitja yfirleitt þingflokksfundi stjórnarflokkanna, og ég hef líka oft séð þeim bregða fyrir á þinginu þar sem meira að segja aumir stjórnarandstæðingar geta spjallað við þá," segir Eygló.

Seint í rassinn gripið

Þá bendir hún á þá staðreynd að Vinstri grænir hafa átt aðild að ríkisstjórn í 18 mánuði. Flokkurinn og ríkisstjórnin hafi haft næg tækifæri til endurskoða lög um fjárfestingu útlendinga í orkufyrirtækjum. Einnig hafi flokkurinn getað beitt sér fyrir því mótuð yrði stefna um auðlindagjald og tryggja þannig að þeir sem nýti þær greiði þjóðinni fyrir afnotin. Þá segir Eygló að það hafi auk þess verið hægt að tryggja að eigendur fyrirtækja sem veita grunnþjónustu gætu ekki hagnast óeðlilega á viðskiptavinum sínum.

„Það er ansi seint í rassinn gripið að senda fjölmiðlum fréttatilkynningu og reyna að kenna öllum öðrum um þegar þingflokkur Vinstri Grænna hafa setið með hendur í skauti þar til tryggt er að öll ráð eru úr þeirra höndum," segir Eygló í pistlinum sem hægt er að lesa hér.