Rúnar vill halda áfram að þjálfa KR

„Við vildum vinna sigur í síðasta heimaleiknum og fara með betri tilfinningu inn í langt frí og því var þetta mjög gott" sagði Rúnar Kristinsson þjálfari KR eftir öruggan 3-0 sigur á Fylki í dag. 

„Menn gerðu sér grein fyrir við vorum á heimavelli, það var Evrópusæti til að spila fyrir og því mættu menn vel tilbúnir í þennan leik. Menn eiga að mæta með sama hugarfar í hvaða leik sem er í hvaða ástandi sem liðið er á tímabilinu "

KR tryggðu sér með þessu Evrópusæti á næsta ári en stóðust ekki spár fyrir tímabilið þar sem KR var spáð einróma titlinum.

„Við höfðum aðeins unnið 4 heimaleiki í ár og það er ekki nógu gott, við náðum að bæta fimmta við erum sáttir með það. Við byrjuðum mótið illa og það varð okkur að falli, við töpuðum fimm stigum strax í byrjun við lið sem voru að koma upp um deild. Við það kemur pressa á liðið og menn fara að stressa sig en við náðum góðum kafla en það féll í leikjunum við FH og Breiðablik. Tapið við FH var verra því það fannst mér einn besti leikur sem strákarnir spiluðu undir mína þjálfaratíð."

„Við náðum þó Evrópusætinu og það hefur gefið liðinu mikið síðustu ár, liðið hefur spilað vel þar og vaxið eftir þátttöku í Evrópukeppninni. Það hefur verið mjög jákvætt, þetta brýtur upp tímabilið og leyfir mönnum að ferðast aðeins og að spila við erfiða andstæðinga. Það gefur liðinu meiri trú á eigin getu og styrkleika og það hefur hjálpað okkur hingað til"

Framtíð Rúnar sem þjálfari KR er í óvissu enda var fyrst samið um að hann myndi taka við út tímabilið.

„ Ég hef fullan áhuga að þjálfa KR að fullu en það þarf að fara yfir þetta innan stjórnarinnar, stjórnin þarf að fara yfir sín mál og þar mun finnast hvar starfskraftar mínir eru best nýttir hvort sem það er yfirmaður knattspyrnumála eða þjálfari, það er það sem skiptir máli."

KR styrktu sig fyrir tímabilið og spiluðu margir leikmenn mjög vel í sumar en Rúnar sagði ekkert vera komið fram í leikmannamálum fyrir næsta tímabil.

„Við erum ekkert farnir að skoða það, við ætluðum að klára tímabilið og skoða svo næstu vikurnar leikmannahópinn okkar, hvað þarf að bæta og hvort það megi hreinsa eitthvað út hérna. Við höfum hug á að fá aftur Guðjón og Guðmund Reyni en við þurfum að hafa samband við GAIS um það, ég hinsvegar skil þá ef þeir vilja spila í atvinnumennsku áfram," sagði Rúnar.