Rökin fyrir fyrningarleiðinni?

Hjörtur Gíslason skrifar um fyrningu aflaheimilda

Með margræðni tungumálsins og hálfkveðnar setningar að leiðarljósi hefur útvegsmönnum verið lýst sem fjandmönnum fólksins um leið og skírskotað hefur verið til frumstæðra hvata eins og öfundar, en hvorki skynsemdar né vitsmuna. Klifað hefur verið á fáeinum merkingarlitlum slagorðum sem eru endurtekin sí og æ."

Þessi tilvitnun gæti allt eins hafa verið skrifuð í gær en staðreyndin er sú að hún er frá árinu 2003 og sótt í grein Sigurðar Líndal, lögfræðings og fyrrverandi prófessors, sem hann skrifaði í apríl það ár. Við lestur greinarinnar verður manni ljóst að umræðan sjö árum síðar hefur lítið breyst. Gömlu andlitin eru flest á sínum stað með örfáum undantekningum og sömu slagorðum beitt.

Ég leyfi mér að vitna aftur í grein Sigurðar þar sem hann segir: „Ég geri enga athugasemd þótt menn vilji breyta stjórnkerfi fiskveiða, telji t.d. handstýringu stjórnmálamanna vænlegri en markaðslausn í anda atvinnufrelsis og sérskatta á útgerðina réttlætismál. En ég fer fram á að menn tjái sig eins og þeir séu að tala við vitiborið fólk og segi skýrt og skilmerkilega hvað þeir gagnrýni, hverju þeir vilji breyta og rökstyðji það."

Það er einmitt þetta ákall lagaprófessorsins um rökstuðning sem mig langar til að gera að umtalsefni. Ríkisstjórnin áformar að hefja fyrningu aflaheimilda í haust. Það liggur ljóst fyrir að fyrningarleiðin færir þjóðinni ekki aukin verðmæti. Félagar mínir í útgerð hafa hver á fætur öðrum komið fram undanfarið og varað við þessum hugmyndum. Forystumenn sjómannasamtakanna vara við þeim. Sveitarstjórnir um land allt vara við þeim. Stjórnvöld hlusta ekki.

Útvegsmenn hafa látið endurskoðunarfyrirtækið Deloitte vinna skýrslu um áhrif fyrningarleiðarinnar á sjávarútvegsfyrirtæki á Íslandi. Niðurstaðan er einföld en ógnvekjandi: Á aðeins fáum árum leiðir hún til gjaldþrots útgerða. Stjórnvöld hafa ekki vefengt niðurstöðurnar. Þaðan af síður virðast þau hafa unnið faglega úttekt á eigin vegum á áhrifum þessara hugmynda. Sé það ásetningur þeirra að fara þessa leið er þá til of mikils mælst að þau leggi fram rök máli sínu til stuðnings?

Höfundur er stjórnarformaður Ögurvíkur hf.