Kvennafrí: Gengið gegn misrétti

"Konur, hittumst á Lækjartorgi kl. 2. Framkvæmdanefnd um kvennafrí."

Hún lét ekki mikið yfir sér, auglýsingin sem þulurinn las fyrir hádegisfréttatíma útvarpsins, föstudaginn 24. október árið 1975.

Þessi hógværa hvatning var þó lokahnykurinn á einum stærsta viðburði hér á landi á síðustu öld.

Talið er að 90 prósent kvenna lagt niður störf þennan fyrsta kvennafrídag árið 1975 eða nánast helmingur þjóðarinnar, til þess að krefjast sömu réttinda og launa og karlar nutu á vinnumarkaði. Aldrei áður hafði þjóðin orðið vitni að annarri eins samstöðu og konur sýndu.

Það var fyrir 35 árum og fyrir þá sem velta því fyrir sér hvort ástæða sé til að endurvekja kvennafrídaginn árið 2010 má benda á nokkrar tölulegar staðreyndir sem teknar eru saman í leiðara Fréttablaðsins í dag.

Heildarlaun kvenna á Íslandi eru 66 prósent af heildarlaunum karla.

Kynbundinn launamunur mælist meiri á Íslandi en á hinum Norðulöndunum

Níu af hverjum tíu stjórnarmönnum í íslenskum fyrirtækjum eru karlar og algengast er að stjórnir fyrirtækja séu eingönu skipaðar körlum.

Íslenskur karl með grunnskólapróf getur vænst hærri launa en kona með háskólapróf.

Þessu misrétti sem viðgengst á vinnumarkaðnum verður mótmælt í dag Konur eru hvattar til að leggja niður vinnu klukkan 14:25. Þá hafa þær unnið fyrir launum sínum þann daginn ef litið er til þess að atvinnutekjur kvenna eru 66% af atvinnutekjum karla.

Dagskráin í ár er einnig helguð baráttu gegn kynferðisofbeldi.

Ein íslensk kona af hverjum þremur sætir grófu kynferðislegu ofbeldi einhvern tímann á lífsleiðinni. Það eru um 300 konur á ári. Þeir dómar sem falla að jafnaði í undirrétti og Hæstarétti eru á hinn bóginn, vart teljandi á fingrum annarrar handar.

Í Reykjavík hittast konur á Hallgrímskirkjutorgi kl. 15:00 og ganga niður að Arnarhóli. Einnig eru skipulagðir viðburðir á Egilsstöðum, Akureyri, Ísafirði Blönduósi og Skagafirði. Frekari upplýsingar er að finna á vefsíðunni kvennafri.is