Erlend pör sem koma í tæknifrjóvgun til Íslands fjölgað verulega

Erlendum pörum sem koma hingað til lands í tæknifrjóvganir hefur fjölgað verulega eftir hrunið. Góður árangur íslenskra lækna og lágt gengi krónunnar skipta þar mestu máli.

Fyrirtækið Art Medica annast allar tæknifrjóvganir á Íslandi. Þar hefur eftirspurn eftir meðferðum aukist nokkuð eftir að kreppa fór að í þjóðfélaginu. Þórður Óskarsson, sérfræðingur, hjá Art Medica segir að biðlistinn eftir meðferðum sé nú orðinn um fimm mánuðir.

Fjöldi meðferða hjá Art Medica er um fimmhundruð og fimmtíu á ári. Á síðustu tveimur árum hefur erlendum pörum fjölgað sem koma í meðferð hér á landi. Þau voru á milli tíu og fimmtán á ári en eru nú á bilinu fimmtíu til sextíu á ári. Flest koma frá Færeyjum, Noregi og Danmörku.

Um fjögur þúsund börn hafa fæðst á Íslandi eftir glasafrjóvganir eða tæknisæðingar frá því þær hófust árið 1991. Árangur íslenskra lækna í tæknifrjóvgunum er einn sá besti í Evrópu og segir Þórður það skipta hvað mestu máli í ákvörðun erlendra para að koma hingað til lands í slíkar meðferðir. Þá hafi lagaumhverfið einnig áhrif og gengi íslensku krónunnar.