Sífellt færri fjölskyldur eiga fyrir mat

Sífellt færri eiga fyrir mat og þurfa á aðstoð hjálparsamtaka að halda. Allt að helmingsaukning hefur orðið hjá nokkrum þeirra á einu ári. Eitt þeirra skoðar að draga úr matarúthlutun.

Síðustu ár hefur myndast biðröð við húsnæði Fjölskylduhjálpar Íslands á hverjum miðvikudegi þegar mat hefur verið úthlutað til þeirra sem þurfa. Um áramótin tók röðin að lengjast. Nú er svo komið að samtökin skoða hvort þau þurfi að fækka úthlutunardögum um einn í hverjum mánuði, og hætta þá úthlutun fyrsta miðvikudag í mánuði, til að fjármagn samtakanna dugi út árið.

Auk Fjölskylduhjálpar úthluta Hjálparstarf kirkjunnar og Mæðrastyrksnefnd Reykjavíkur reglulega mat. Á báðum stöðum fjölgaði umsækjendum eftir áramótin.

Hjá Mæðrastyrksnefnd Reykjavíkur sóttu um fimmhundruð á viku að jafnaði um mataraðstoð í febrúar. Það er helmingi meira en á sama tíma í fyrra. Hjá Hjálparstarfi kirkjunnar hafa menn áhyggjur af ástandinu. Meðal annars hefur verið brugðist við með því að breyta úthlutunarreglum á þann hátt fólk þarf að skila inn yfirliti yfir útgjöld og tekjur eftir fyrstu komu. Þetta er gert til að meta betur í hvaða stöðu fólk er þegar tekin er ákvörðun um hvort að veita skuli aðstoð. Vilborg Oddsdóttir félagsráðgjafi hjá Hjálparstarfi kirkjunnar segir ljóst að næstu tvö ár geti orðið erfið.