Dagur: Ómenguð frjálshyggjustefna í borginni

Dagur B. Eggertsson oddviti Samfylkingarinnar í borgarstjórn segir greinilegt að pólitískar átakalínur séu farnar að skýrast í borginni. Hann segir þriggja ára áætlun meirihlutans um fjárhag og rekstur borgarinnar sem kynnt var í gær merki um eina ómenguðustu frjálshyggjustefnu í atvinnumálum sem kynnt hafi verið frá hruni. Dagur bendir á að samdráttur í framkvæmdum á vegum borgarinnar nemi um 70 prósentum og getur hann þess að árið 2008 hafi verið framkvæmt fyrir 10,3 milljarða en að áætlað sé að framkvæma fyrir 1,3 milljarða árið 2013.

„Rétt er að minna á að til viðbótar niðurskurði í framkvæmdum hefur meirihlutinn þegar skorið niður í viðhaldi fasteigna úr 1.323 milljónum 2008 í 734 milljónir á yfirstandandi fjárhagsáætlun eða um nær 50%," segir Dagur ennfremur. „Enn meiri niðurskurður er í viðhaldi í umhverfi borgarinnar eða úr 1.323 milljónum árið 2008 í 611 milljónir króna á yfirstandandi ári."

Dagur segir að sér finnist viðbrögð borgarstjóra við gagnrýni Samfylkingarinnar í gær athyglisverð en hann segir hana hafa svarað með þeim orðum að „ljóst væri að Samfylkingin "hefði ekki trú á atvinnulífinu"," segir Dagur og bætir við að líklega sé um eina ómenguðustu frjálshyggjustefnu í atvinnumálum sem kynnt hefur verið frá hruni.

„Það á ekkert að gera - bara bíða. Klassísk jafnaðarstefna á krepputímum er þvert á móti sú að þá sé réttlætanlegt og mikilvægt að stuðla að atvinnu með opinberum fjárfestingum og átaki í tímabærum viðhaldsverkefnum, eftir því sem nokkur kostur er," segir Dagur og bætir því við að ljóst sé að pólitískar átakalínur í borginni séu að skýrast.