Flugfélögin þurfa að punga út 400 milljónum

Samtök ferðaþjónustunnar lýsa yfir áhyggjum af miklum kostnaðarhækkunum sem fylgja gjaldskrárbreytingum þeim sem samgönguráðherra samþykkti í síðustu viku. Að mati samtakanna má gera ráð fyrir að flugfélögin þurfi að borga um 400 milljónir króna í aukin gjöld nú þegar á þessu ári til annarsvegar Keflavíkurflugvallar og hinsvegar til Flugstoða.

Samkvæmt breytingunni bætast við ný gjöld og þau sem fyrir eru hækka. „Þannig hækkar flugverndargjald um 53%, fer úr 620 krónum í 950 krónur. Nýtt farþegagjald uppá 150 krónur á hvern farþega verður lagt á og nýtt leiðarflugsgjald verður jafnframt lagt á en það reiknast eftir þyngd loftfars og lengd flugs. Lendingargjöld í innanlandsflugi hækka jafnframt um 25%," segir í tilkynningu frá Samtökum ferðaþjónustunnar.

Samtökin telja að þar sem gjaldskrárbreytingin taki gildi eftir einungis tvo mánuði sé ljóst að stór hluti þessa kostnaðar muni koma beint frá flugfélögunum. Langt sé liðið á aðalsölutímabil sumarsins og ekki sé möguleikar til að „velta þessum hækkunum á þá farþega" sem þegar hafa greitt fyrir sína ferð.

Lítið svigrúm til frekari hagræðingar

Samtök ferðaþjónustunnar hafa lagt á það mikla áherslu að allar slíkar breytingar á gjalda og skattaumhverfi greinarinnar verði að koma með góðum fyrirvara, aðdragandi sölu á ferðaþjónustu sé langur og því séu það mikil vonbrigði að samgönguráðherra hafi nú samþykkt þessa breytingu með svo stuttum fyrirvara.

„Flugfélögin hafa farið í gegnum mjög erfitt tímabil með miklum kostnaðarhækkunum í öllum erlendum aðföngum og samdrætti í eftirspurn á undanförnum árum og því er svigrúm til frekari hagræðingar ákaflega lítið. Nú þegar kraftur er í sókn þessara fyrirtækja og verið er að bæta við nýjum áfangastöðum eru slíkar fyrirætlanir settar í uppnám með auknum gjaldtökum," segir í tilkynningunni.

Þá ítreka Samtök ferðaþjónustunnar ályktun samtakanna frá aðalfundi sínum þann 23. mars síðastliðinn þar sem segir: „Í þeirri stöðu sem þjóðfélagið er í á að lækka skatta en ekki hækka. Þannig eykst eftirspurn og störfum fjölgar."