Foster vill vera áfram hjá United

Ben Foster segist engan áhuga á því að fara frá Manchester United þó svo að hann hafi ekki fengið mikið að spila á leiktíðinni. Þrátt fyrir það var hann valinn í enska landsliðshópinn.

„Maður á ekki von á því að fá landsliðssæti þegar maður er ekki að spila. En ég vil samt ekki fara frá Manchester United," sagði hann í samtali við enska fjölmiðla.

„Manchester United er stærsta félag heims. Ég veit að ef ég verð áfram þar mun ég fá mitt tækifæri. Það væri skref niður á við fyrir mig að fara eitthvað annað. Ég verð bara að vera þolinmóður."

Foster átti stórleik er Manchester United vann Tottenham í úrslitum ensku deildabikarkeppninnar en segist samt ekki geta kvartað.

„Edwin (van der Sar) hefur verið að standa sig frábærlega. Ég verð að bíða fram á sumar og prófa aftur á næsta tímabili. Ég vil vera hjá United eins lengi og ég get."