Zlatan forðaði sér undan æstum aðdáendum - myndir

Zlatan Ibrahimovic var í dag kynntur sem nýr leikmaður spænska liðsins Barcelona og fékk Svíinn snjalli að leika sér fyrir framan fjölmarga ljósmyndara og stuðningsmenn félagsins sem fjölmenntu á Nou Camp. Það er talið að 60 þúsund manns hafi mætt á kynningu Zlatan.

Aldrei áður hafa fleiri komið á kynningu á nýjum leikmanni Barcelona en 20 þúsund manns tóku á móti Ronaldinho og 30 þúsund mættur þegar Thierry Henry var kynntur.

Joan Laporta, forseti Barcelona, hefur gefið það upp opinberlega að Barca hafi látið ítalska liðið Inter fá Samuel Eto'o og borgað 46 milljónir evra að auki fyrir Zlatan Ibrahimovic. Samingurinn er metinn upp á 66 milljónir evra.

Hátíðin leystist þó fljótlega upp þegar þúsundir stuðningsmanna ruddust inn á völlinn og þurfti Zlatan Ibrahimovic að forða sér í skjóli öryggisvarða. Hér fyrir neðan má sjá myndir af kynningu Zlatans Ibrahimovic.