Álfukeppnin hefst í dag með tveimur leikjum

Evrópumeistarar Spánar verða í sviðsljósinu í dag þegar leikar hefjast í Álfukeppninni í Suður-Afríku.

Heimamenn í Suður-Afríku mæta Írak í opnunarleik keppninnar en Spánverjar mæta svo Nýja-Sjálandi síðar um daginn. Öll landsliðin leika í a-riðli keppninnar.

Evrópumeistararnir hafa verið illviðráðanlegir undanfarið og eru augljóslega taldir mun sigurstranglegri gegn Nýja-Sjálandi en markvörðurinn Iker Casillas segir landa sína þó ekki ætla að vera með neitt vanmat.

„Við erum ríkjandi Evrópumeistarar en við berum fulla virðingu fyrir öllum mótherjum sem við mætum og munum ekki vanmeta neitt land í keppninni. Við ætlum okkur hins vegar stóra hluti í keppninni og gerum allt okkar til þess að ná árangri," segir markvörðurinn.

Spánverjar eru í 1. sæti á heimslista FIFA en Nýja-Sjáland er í 82. sæti.