Hutton: Tímabilið hefur verið algjör martröð

Alan Hutton, leikmaður Tottenham, segir að tímabillið hafi verið algjör martröð fyrir sig enda hefur honum illa gengið að ná sér heilum af meiðslum sínum.

Hutton gekk til liðs við Tottenham í janúar í fyrra frá Rangers en kaupverðið nam níu milljónum punda. Hann þótti standa sig vel fyrsta hálfa árið hjá félaginu en hann hefur verið plagaður af meiðslum síðan í sumar.

Hann er þó byrjaður að æfa á nýjan leik nú og lék í 70 mínútur með varaliði Tottenham í gærkvöldi. Hann hefur nú sett stefnuna á leiki Skotlands í undankeppni HM 2010 gegn Hollandi og Íslandi.

„Ég hlakkaði til að hefja nýtt tímabil með Tottenham en svo meiddist ég. Síðan náði ég mér af þeim meiðslum en fann svo þegar að ég meiddist á nýjan leik. Þetta hefur því verið erfitt en ég er ánægður með að vera byrjaður á nýjan leik. Vonandi get ég haldið áfram og staðið mig vel."

„Mér fannst ég standa mig ágætlega í þessar 70 mínútur í dag. Ég tel jafnvel að ég hefði getað spilað meira," sagði Hutton sem ætlar nú að einbeita sér að landsleikjunum.

„Það er draumur hvers ungs drengs að spila í úrslitakeppni HM og er ég engin undantekning. Ég vil vera með í þessum leikjum."