Siðareglur samþykktar í borgarráði

Borgarráð samþykkti á fundi sínum í dag einróma siðareglur fyrir kjörna fulltrúa hjá Reykjavíkurborg og að þær verði lagðar fyrir borgarstjórn til staðfestingar síðar í mánuðinum. „Loksins, loksins," segir Dagur B. Eggertsson, borgarfulltrúi Samfylkingarinnar.

Fram kemur í tilkynningu frá Reykjavíkurborg að borgarráð hafi einnig samþykkt að settar verði reglur um skráningu á fjárhagslegum hagsmunum borgarfulltrúa og trúnaðarstörfum þeirra utan borgarstjórnar eins og gert hefur verið á Alþingi og mun forsætisnefnd ljúka útfærslu slíkra reglna.

Markmið siðareglnanna er að skrá og skilgreina þá háttsemi sem kjörnir fulltrúar vilja sýna af sér við öll sín störf og er gert ráð fyrir að þeir undirgangist siðareglurnar með undirskrift sinni og lýsi því þar með yfir að þeir ætli að hafa þær að leiðarljósi. Í siðareglunum er meðal annars fjallað um starfsskyldur kjörinna fulltrúa, valdmörk, hagsmunaárekstra, gjafir og fríðindi og trúnað.

„Nú, hálfu þriðja ári eftir að Samfylkingin fékk samþykkta tillögu um að skrá skyldi siðareglur fyrir borgarstjórn voru þær samþykktar í borgarráði. Tillagan var samþykkt í borgarstjórn 5. júní 2007," segir Dagur í tilkynningu.

Hann segir næstu skref ekki síður mikilvæg. Mikilvægt sé að sveitarstjórnarlögum verði breytt og sameiginleg siðanefnd verði stofnuð á vettvangi Sambands sveitarfélaga eins fljótt og kostur til að fjalla um álitamál og einstök mál sem til hennar verði vísað.