„Niðurskurðurinn samsvarar þriggja daga vöxtum af Icesave“

„Þarna birtast hin raunverulegu áhrif á daglegt líf fólksins í landinu þegar svona niðurskurður hjá ríkinu á sér stað. Niðurskurðurinn hjá lögreglunni á höfuðborgarsvæðinu samsvarar þriggja daga vöxtum af Icesave láninu," segir Sigmundur Davíð Gunnlaugsson, formaður Framsóknarflokksins, aðspurður um fjárskort lögreglunnar á höfuðborgarsvæðinu.

Sigmundur sat á fundi með breskum og bandarískum lögfræðingum varðandi Icesave málið, þegar fréttastofa náði tali af honum.

Þetta er nú bara upphafið segir formaðurinn.

„Svona lagað á líka eftir að gerast á heilbrigðissviðinu og í menntakerfinu, þannig að þetta er rétt að byrja. Þessi mál eru meðal annars ástæðan fyrir því að það verður að halda umræðunni um Icesave samningana gangandi. Þetta er grafalvarlegt mál," segir Sigmundur, en hann hefur verið eindreginn andstæðingur Icesave samninganna.