Lögreglufélag Reykjavíkur tekur undir neyðarkall lögreglumanns

21. júlí 2009 15:34

Vísi hefur borist tilkynning frá Stjórn Lögreglufélags Reykjavíkur þar sem hún tekur undir sjónarmið lögreglumannsins sem sendi bréf til Vísis og lýsti óásættanlegu vinnuumhverfi lögreglumanna.

Hér má lesa tilkynninguna í heild sinni:

„Stjórn Lögreglufélags Reykjavíkur (LR) getur ekki annað en tekið undir sjónarmið lögreglumanns sem kom fram í bréfi er birt var á visir.is þann 21/7 og skorar í framhaldi af því á stjórnvöld að endurskoða fyrirhugaðan niðurskurð fjármála til lögreglu.

Stjórn LR hefur ítrekað bent á versnandi ástand í löggæslumálum, öryggi lögreglumanna og öryggi íbúa en talað fyrir daufum eyrum.

Nýjar tölur embættis Ríkislögreglustjóra hafa jafnframt varpað en frekara ljósi á ástandið er varðar aukna glæpi og öryggi íbúa og undirstrikar með því orð LR í þeim málum.

LR tekur einnig fram að þetta bréf er ekki skoðun þessa eina lögreglumanns heldur endurspeglar hug flestra félagsmanna. Stjórn LR getur staðfest að lögreglumenn haf í auknum mæli lýst yfir áhyggjum sínum af eigin öryggi í starfi."

Tengdar fréttir

Stjórnmálamenn þurfa að hlusta á sjónarmið lögreglunnar

„Þessi sjónarmið að það á ekki ekki að ganga nærri lögreglunni á þessum tímum eru sjónarmið sem ég hef haldið skýrt á lofti. En það er fjárveitingavaldið sem stjórnmálamennirnir stjórna sem þurfa að hlusta á þessi sjónarmið sem koma úr öllum áttum innan lögreglunnar," segir Stefán Eiríksson, lögreglustjóri á höfuðborgarsvæðinu.

21. júlí 2009 15:02

„Við erum ekki einu sinni reiðir lengur, við erum bara orðnir þreyttir“

„Niðurskurðurinn eru 51,1 milljón og því verður ekki náð nema með stórfelldum niðurskurði á yfirvinnu og með því að segja starfsfólki upp," segir Snorri Magnússon, formaður Landsamabands lögreglumanna en Vísir sagði frá áhyggjufullum lögreglumanni í morgun sem sendi fréttastofu bréf þar sem hann lýsti erfiðu starfsumhverfi lögreglumanna.

21. júlí 2009 12:26

Neyðarkall frá lögreglumanni

Lögreglumönnum er stefnt í hættu vegna fámennis í lögreglunni á höfuðborgarsvæðinu. Í sumum tilfellum eru þeir einir á bílum, jafnvel á næturvöktum um helgar. Svo hljóðar bréf sem fréttastofa Vísis og Stöðvar 2 fékk sent í gærkvöld frá manni sem segist vera lögreglumaður. Maðurinn segist ekki koma fram undir nafni af ótta við yfirstjórn Lögreglunnar á höfuðborgarsvæðinu.

21. júlí 2009 09:31