Framkvæmdastjóri Samfylkingarinnar: Bíðum ekki eftir Sjálfstæðisflokknum

,,Samfylkingin hefur mikið verk að vinna á næstu 100 dögum. Við munum ekki hlaupast frá erfiðum verkum en hitt er morgunljóst að við munum ekki bíða lengur eftir því að samstarfsflokkurinn leggist á árarnar með okkur í bráðnauðsynlegum björgunaraðgerðum," segir Skúli Helgason, framkvæmdastjóri Samfylkingarinnar, í leiðara á vefsíðu flokksins.

Skúli segir að kosningar leysi ekki bráðavandann og strax eftir helgi þurfti að taka til óspilltra málanna við að koma hlutum á hreyfingu. Hvort sem núverandi ríkisstjórn situr áfram eða önnur tekur við. ,,Það þarf að hreinsa til í Seðlabanka Íslands í því skyni að endurvinna traust innanlands og á alþjóðavettvangi," segir framkvæmdastjórinn og bætir við að eðlilegt sé að gera breytingar á skiptingu ráðuneyta milli flokkanna til að styrkja verkstjórnina á þeim sviðum sem mestu munu ráða um hag heimila og fyrirtækja í landinu á komandi vikum.

,,Verkefnið er ögrandi en það kemur ekkert annað til greina en að hér verði við völd kraftmikil ríkisstjórn sem kemur hlutum í verk á þeim 100 dögum sem lifa fram að kosningum."

Björgvin hefur höggvið á hnútinn

,,Björgvin G. Sigurðsson viðskiptaráðherra hefur höggvið á hnútinn í þeirri pattstöðu sem einkennt hefur íslensk stjórnmál að undanförnu," segir framkvæmdastjórinn. Með afsögn sinni og ákvörðun um að hreinsa til í yfirstjórn Fjármálaeftirlitsins gefur Björgvin tóninn fyrir þá löngu tímabæru hreingerningu sem Samfylkingin hefur barist fyrir innan ríkisstjórnarinnar undanfarna mánuði, að mati Skúla.

,,Krafan um endurnýjun í yfirstjórn Seðlabanka Íslands verður nú enn háværari og Sjálfstæðisflokkurinn hefur ekki annan kost en að svara því kalli ef hann vill eiga sér viðreisnar von." segir framkvæmdastjórinn.

Skúli segir að með ákvörðun sinni leggi Björgvin sitt af mörkum við að breyta pólitískri siðmenningu landsins. Afsögn hans er ekki staðfesting á einhvers konar afglöpum eða sekt heldur fyrst og fremst viðurkenning á þeirri staðreynd að ríkisstjórninni hefur ekki tekist að mynda það trúnaðarsamband við þjóðina sem er forsenda þess að endurreisn samfélagsins eftir bankahrunið geti átt sér stað í sæmilegum friði. ,,Nú eru ekki forsendur til að fella endanlega dóma um frammistöðu einstakra ráðamanna í aðdraganda og eftirleik bankahrunsins en til þess er m.a. Rannsóknarnefnd Alþingis skipuð sem nú er að störfum og skilar af sér í haust," segir Skúli.

Hægt er að lesa leiðara Skúla hér.