Eyjólfur: Þýskan kom mér um koll

Eyjólfur Sverrisson, þjálfari U-21 landsliðs karla, var sendur upp í stúku í lok leiks Íslands og Norður-Írlands í Grindavík í dag. Ísland vann leikinn, 2-1.

Þetta gerðist í blálok leiksins en Eyjólfur sagði eftir leik að það hefði verið eitthvað sem hann sagði sem hefði farið í taugarnar á austurríska dómaranum.

„Ég held að þýskan hafi loksins komið mér um koll. Ég man nú ekki einu sinni hvað ég sagði en það hefur greinilega farið eitthvað illa í hann," sagði Eyjólfur.

Hann var þó afar ánægður með sigur sinna manna í dag enda sá þriðji í röð undir hans stjórn.

„Við erum á góðu róli og ætlum ekki að láta neitt stoppa okkur," sagði hann.