Hiddink verður Chelsea innan handar í sumar

Chelsea mun falast eftir aðstoð Guus Hiddink í leikmannamálum sínum í sumar þó svo að óvíst sé hvort að Hollendingurinn verði við stjórnvölinn hjá liðinu á næstu leiktíð.

Samningur Hiddink við Chelsea rennur út í vor en þá mun hann aftur einbeita sér að þjálfun rússneska landsliðsins.

Hins vegar hefur verið greint frá því að hann gæti fengið sig lausan undan samningi sínum við rússneska knattspyrnusambandið í nóvember næstkomandi ef Rússlandi mistekst að komast í úrslitakeppni HM 2010.

„Við ætlum að biðja um álit hans á leikmannamarkaðnum í sumar," sagði Bruce Buck, stjórnarformaður Chelsea, í samtali við enska fjölmiðla.

Buck varði einnig stefnu félagsins í leikmannamálum en Chelsea hefur eytt langmest í leikmenn af ensku knattspyrnufélögunum undanfarin fimm ár og ekki allir leikmenn hafa staðið undir væntingum.

„Ég tel ekki að við gerum fleiri mistök en önnur félög," sagði Buck. „Við gerðum fimm ára áætlun. Þetta eru ekki fullkomin vísindi."