Butt: Newcastle er á niðurleið

Miðjumaðurinn Nicky Butt hjá Newcastle segir að liðið hafi verið á niðurleið undanfarin ár og muni þurfa að taka á öllu sínu ef það á ekki að falla úr úrvalsdeildinni í vor.

Newcastle heldur sér af fallsvæðinu á markamun einum saman og næstu tveir leikir liðsins eru gegn Arsenal og Chelsea, svo útlitið er ekki glæsilegt hjá norðanmönnum.

"Okkur hefur farið aftur síðustu ár og við gerum okkur fulla grein fyrir því hvað við þurfum að gera. Við eigum nokkra risaleiki fyrir höndum og við verðum að halda þessu félagi í úrvalsdeildinni. Við verðum að gleyma þessu tímabili og einbeita okkur að því næsta. Það er eins og maður sé alltaf að nota þessa setningu hjá Newcastle," sagði Butt í samtali við Independent.