Rammíslenskur plötusnúður gerir víðreist á SXSW

Hinn íslenski skífuþeytir Illugi Magnússon, betur þekktur undir listamannsheitinu DJ Platurn, stimplar sig heldur betur hressilega inn á tónlistarhátíðina SXSW („South by Southwest") í Texas en hún hefst einmitt í dag og stendur fram á sunnudag.

Illugi spilar hvorki meira né minna en sjö sinnum á hátíðinni en hann býr og starfar í Kaliforníu. Íslendingar eru ekki alveg ókunnugir Illuga, honum voru gerð ítarleg skil í kvikmyndinni „From Oakland to Iceland" eftir Ragnhildi Magnúsdóttur útvarpskonu en myndin var sýnd í sjónvarpi hér á landi í fyrra. SXSW er vinsæl hátíð í Bandaríkjunum og ein þeirra stærstu enda Texasbúar þekktir fyrir allt annað en að gera litla hluti. Þeir sem áhuga hafa geta kynnt sér skífuþeytinn knáa nánar hér.