Eiður Smári frá í þrjár vikur

Eiður Smári Guðjohnsen verður frá keppni næstu þrjár vikurnar vegna meiðsla á öxl. Hann missti einnig af landsleik Íslands og Suður-Afríku í vikunni.

Eiður Smári meiddist á æfingu með Monaco skömmu fyrir landsleikinn og eru meiðslin það alvarleg að hann mun ekki verða leikfær á ný fyrr en í næsta mánuði.

Monaco er sem stendur í fjórða sæti frönsku úrvalsdeildarinnar með fimmtán stig eftir átta leiki. Liðið mætir Lens á heimavelli á morgun en auk hans mun Eiður Smári sennilega missa af leikjum liðsins gegn Boulogne og Bodeaux, báðum á útivelli.

Eiður hefur reyndar ekki byrjað neitt sérstaklega vel í franska boltanum og mátti sætta sig við að sitja á bekknum í síðasta leik Monaco.