Drogba í sex leikja bann

Didier Drogba var í dag dæmdur í sex leikja bann fyrir framkomu sína að loknum leik Chelsea og Barcelona í undanúrslitum Meistaradeildar Evrópu í vor.

Hádramatískri viðureign liðanna lauk með því að Börsungar tryggðu sér sæti í úrslitunum. Leikmenn Chelsea mótmæltu mjög dómgæslunni eftir að leiknum lauk og gekk þar Drogba fremstur í flokki.

Bannið í síðustu tveimur leikjunum er þó skilorðsbundið í tvö ár og því undir honum sjálfum komið að passa upp á hegðun sína.

Liðsfélagi Drogba, Jose Bosingwa, fékk fjögurra leikja bann fyrir framkomu sína eftir leikinn. Bannið í síðasta leiknum er skilorðsbundið.

Þá var Chelsea sektað um 100 þúsund pund fyrir slæma hegðun leikmanna sinna í umræddum leik.