Skaðlegar skattahækkanir

Um þessar mundir er verið að taka mjög afdrifaríkar ákvarðanir í skattamálum hér á landi. Skattahækkanir upp á tugi milljarða munu draga almenning og atvinnulíf hér á landi enn meira niður, auka atvinnuleysi og verðbólgu og veikja baráttukraft þjóðarinnar. Neysla mun minnka, sem mun hafa áhrif á fjölmörg fyrirtæki og lækka þannig skatttekjur ríkisins. Skattkerfið verður flóknara með fleiri skattþrepum. Aukinn skattur verður lagður á sparnað fólks með umtalsverðri hækkun fjármagnstekjuskatts og hækkun á tryggingargjaldi sem er beinn launaskattur á fyrirtæki. Eignarskattur er nánast eins og eignaupptaka. Engin vissa er svo fyrir því að þessi aukna skattheimta muni skila sér. Á sama tíma er fólk að taka á sig launafrystingu og jafnvel launalækkun.

Auk beinna skatta á fyrirtæki og einstaklinga á meðal annars að hækka virðisaukaskatt á mikilvægar greinar eins og veitingahúsastarfsemi og búa til enn nýtt þrep í virðisaukaskatti. Þetta mun hafa slæm áhrif á rekstur veitingastaða og þar með veikja samkeppnisstöðu þeirra sem sinna ferðaþjónustu. Þetta mun enn frekar auka flækjustig og misferli í skattheimtu. Margt bendir til þess að misrétti sé meira en nokkru sinni fyrr. Þetta endurspeglast t.d. í því að bankastofnanir ráða nú hvaða fyrirtæki lifa, hver deyja og hvernig þau eru seld eða skuldir afskrifaðar. Bankarnir skipa líka stjórnarmenn. Þau fyrirtæki sem lifa eru síðan mikið undir stjórn ríkisbankanna. Fasteignafélög verða gjaldþrota eða fá afskrifaðar skuldir og geta boðið umtalsvert lægra leiguverð á húsnæði í samkeppni við fyrirtæki sem eru í eðlilegum rekstri. Þannig lenda vel rekin fyrirtæki sem skulda lítið í miklum erfiðleikum.

Í viðtali í Kastljósi á fimmtudagskvöld lýsti Styrmir Gunnarsson fyrrverandi ritstjóri Morgunblaðsins þeirri eindregnu skoðun sinni að færa þyrfti völdin frá flokkunum eða stjórnmálamönnunum til fólksins. Hann hefði mátt predika þetta betur þegar hann var ritstjóri, en það er alveg rétt að fjármunir og völd eru að flytjast í auknum mæli frá fólkinu til ríkisvaldsins og stofnana og fyrirtækja í eigu ríkisins til greiðslu á gífurlegri skuldasöfnun þjóðarinnar. Skattkerfið verður flóknara og staðgreiðslukerfi skatta eyðilagt. Þetta mun dýpka kreppuna og draga kraft og kjark úr fyrirtækjum og einstaklingum.

Stjórnvöld boðuðu fyrst óhuggulega miklar skattahækkanir, en hafa nú eitthvað slegið af. Eftir standa samt miklar hækkanir og mun flóknara skattkerfi. Því miður er ekki víst að þjóðin átti sig á því hvað þessar skattkerfisbreytingar eru hættulegar og flóknar. Við þurfum að hafa fullan skilning á því að ekki er hægt að skera allt niður í ríkisrekstrinum og ná þarf jafnvægi á einhverjum árum. En það eru til fleiri leiðir en þessi skattahækkunarleið og þessi skattkerfisbreyting er ekki heillavænleg. Vonandi tekst stjórnmálamönnum í öllum flokkum að vinna saman að því núna að finna betri lausn á vanda þjóðarbúsins. Ef einhvern tíma er þörf á samstöðu þá er það núna.