Ferdinand klár gegn Inter

Manchester United hefur fengið góð tíðindi fyrir leikinn gegn Inter á Old Trafford annað kvöld. Varnarmaðurinn Rio Ferdinand hefur náð sér af ökklameiðslum sem hann hlaut gegn Fulham í bikarnum á laugardaginn.

Ferdinand fór af velli í hálfleik á laugardaginn vegna meiðslanna og tók Johnny Evans þá stöðu hans. Rio tók þátt í æfingu United í dag án vandamála í morgun og verður því væntanlega við hlið Nemanja Vidic í leiknum mikilvæga annað kvöld. Vidic missti af leiknum á Ítalíu vegna leikbanns.

Sir Alex Ferguson er þó í nokkrum vandræðum með stöðu hægri bakvarðar í leiknum annað kvöld, því þeir Gary Neville, Rafael og Wes Brown eru allir meiddir.

John O´Shea er hinsvegar byrjaður að æfa aftur eftir að hafa meiðst á hæl.