Laddi leikur Ebba Skrögg

„Ég leik Skrögg, eða Scrooge, draugana og allt. Þetta er einleikur. Ég þarf að gera allt sjálfur. Það er alltaf svoleiðis,“ segir Þórhallur Sigurðsson eða Laddi.

Í gær skrifuðu Laddi og Bjarni Haukur Þórsson leikhússtjóri Loftkastalans undir samning þess efnis að Laddi leiki eina þekktustu jólasögu allra tíma eða Jólaævintýri eftir Charles Dickens. Sagan segir af hinum fégráðuga Ebenezer Scrooge og samskiptum hans við drauga um jólanótt. Sagan kom fyrst út 19. desember árið 1843 og telst mikilvæg áminning um hinn sanna jólaanda. Að sögn Bjarna hefur Jólaævintýri reynst mörgum kvikmyndaleikstjóranum efniviður og margir þekktir leikarar túlkað Scrooge. „Þeirra á meðal George C. Scott, Bill Murray, Kelsey Grammer og Patrick Stewart. Einnig mun glæný teiknimynd þar sem enginn annar en Jim Carrey mun túlka Scrooge líta dagsins ljós næsta vetur,“ segir Bjarni Haukur. Hugmyndin er að sýna verkið aðeins í desember en keyra þá sýningar nokkuð þétt. Taka svo upp þráðinn að ári.

„Bara sýnt í desember, kannski tuttugu sýningar eða svo. Og að ári liðnu mæti ég aftur og flyt þetta,“ segir Laddi en verkefnið leggst sérlega vel í hann þó Laddi segi þetta ekki létt verk. Hann segir söguna og bregður sér í allra kvikinda líki. Þó Laddi sé einhver ástsælasti skemmtikraftur þjóðarinnar er hann vanur leiksviðinu og má meðal annars nefna frábæra frammistöðu hans í Óliver Tvist þar sem hann lék Fagin – ræningjaforingjann í Þjóðleikhúsinu fyrir margt löngu. Tónlist og hljóðmynd skipa veigamikinn sess í Jólaævintýri en leikgerðina gera Jón Gunnar Þórðarson, Egill Antonsson og Sindri Þórarinsson. Leikstjóri er Jón Gunnar.

Sýningunni Laddi 6-tugur sem sýnd var í Borgarleikhúsinu er nú lokið eftir rúmar 120 sýningar og áhorfendafjölda upp á tæplega 80 þúsund manns. „Jú, velgengni þeirrar sýningar kom mér heldur betur ánægjulega á óvart og ég er í skýjunum yfir þeim viðtökum. Þetta var mikil törn til tveggja ára. Og menn hálf ómögulegir eftir að þetta hætti. Sitja heima hjá sér, hringja hver í annan og segja: Eigum við ekki að fara að hittast. Þetta er skrýtið ástand eftir að hafa umgengist hópinn svo mikið og reglulega.“