Ferguson: Vorum ekki nógu góðir

Sir Alex Ferguson, stjóri Man. Utd, viðurkenndi eftir tapið gegn Fulham í dag að hans menn hefðu einfaldlega ekki verið nógu góðir í leiknum. United tapaði fyrir Liverpool í síðustu umferð og þetta er í fyrsta skipti í 147 leikjum sem United tapar tveim leikjum í röð í deildinni.

„Við fórum einfaldlega aldrei í gang í fyrri hálfleik. Fulham-strákarnir voru líflegir og tóku á okkur. Það eru vonbrigði að við höfum ekki tekið á móti. Leikir sem tapast í mars og apríl geta orðið dýrir. Sem betur fer höfum við smá forskot," sagði Ferguson hundsvekktur.

Hann var ekki par sáttur við síðara gula spjaldið sem Rooney fékk.

„Kastaði hann boltanum í dómarann? Boltanum var kastað beint í áttina þar sem átti að taka aukaspyrnu. Fór hann í dómarann? Nei. Hann kastaði boltanum til baka því hann vildi koma leiknum í gang. Hvað er hægt að segja við því?" sagði Ferguson sem var ekki sáttur við dómarann en vildi samt ekki ræða um hann.

„Það skilar engu. Við spiluðum ekki nógu vel til þess að vinna leikinn. Þannig var það bara."