Samskip áfram með rekstur Grímseyjarferjunnar Sæfara

Samningur Vegagerðarinnar og Samskipa um rekstur Grímseyjarferjunnar Sæfara hefur verið framlengdur til næstu tveggja ára. Landflutningar-Samskip hafa annast rekstur ferjunnar óslitið í rúm 12 ár, eða frá 1. maí 1996.

Nýtt skip, sem getur tekið allt að 108 farþega og 160 tonn af varningi, var tekið í notkun í fyrra og er öll aðstaða til farþegaflutninga mun betri í nýju ferjunni. Siglt er þrisvar í viku á milli Dalvíkur og Grímseyjar; á mánudögum, miðvikudögum og föstudögum, en tvisvar í viku á milli Dalvíkur og Hríseyjar; á þriðjudögum og fimmtudögum. Skipstjóri á Sæfara er Sigurjón Herbertsson.

Nokkur aukning hafi verið milli ára í farþegaflutningum með Sæfara, fyrst og fremst yfir sumartímann. „Aukningin milli áranna 2007 og 2008 var t.d. allt að 40% og munar þar sérstaklega um fjölgun farþega til og frá Grímsey, m.a. vegna markvissrar vinnu Grímseyjarhrepps í móttöku ferðamanna," segir í tilkynningu frá Samskipum.

Grímseyjarferjan Sæfari er um 40 metra löng og 10 metra breið, smíðuð árið 1992, en keypt hingað til lands í desember 2005. Voru umtalsverðar endurbætur gerðar á skipinu hérlendis, áður en það var tekið í gagnið í apríl 2008.