Guðlaugur Victor: Heiður að spila við hlið Gerrard

Unglingalandsliðsmaðurinn Guðlaugur Victor Pálsson hjá Liverpool er í viðtali á opinberri heimasíðu félagsins í dag þar sem hann talar um reynslu sína á að spila við hlið fyrirliða aðalliðs félagsins, Steven Gerrard, í æfingarleik gegn Tranmere á dögunum.

Athygli vakti að Guðlaugur Victor hélt fyrirliðabandi varaliðsins þrátt fyrir að Gerrard spilaði leikinn.

„Þetta var stórkostleg upplifun og sannur heiður og fá að spila við hlið Gerrard, sem er einn besti miðjumaður í heimi. Ég var reyndar svolítið stressaður, sérstaklega í ljósi þess að ég væri gerður fyrirliði í leiknum og bauð honum fyrirliðabandið en hann sagði mér að halda því og njóta þess að spila leikinn.

Hann hjálpaði mér líka mjög mikið í leiknum og talaði mig í gegnum hlutina og það var frábært," segir Guðlaugur Victor.

Guðlaugur Victor segist í viðtalinu kunna vel við sig í Liverpoolborg og hlakka mjög til síns fyrsta heila tímabils hjá félaginu en hann kom sem kunnugt þangað frá AGF í Danmörku.